വെറുതെ ഒരു വ്യാമോഹം...

തുറന്ന് കിടന്ന ജാലകത്തിലൂടെ ഒരു തണുത്ത കാറ്റ് മുറിയിലേക്ക് കടന്നു. അയാള്‍ക്ക് ഉറങ്ങാന്‍ കഴിയുന്നില്ല. വേണോ വേണ്ടയൊ, അയാള്‍ ആലോചിച്ചു. ഇതിപ്പോ പല തവണയായി ആവര്‍ത്തിക്കുന്നു.

ഒരു പുലര്‍കാല വിമാനം പറന്നുയര്‍ന്നതിന്‍റെ ഹുങ്കാര ശബ്ദം അയാളുടെ കാതുകളില്‍ പതിഞ്ഞു. എത്ര ശ്രമിച്ചിട്ടും കിടക്കാന്‍ കഴിയാതെ വന്ന അയാള്‍ പതുക്കെ എഴുന്നേറ്റു വസ്ത്രം മാറി, വാതില്‍ പതിയെ ശബ്ദമുണ്ടാക്കതെ തുറന്നു.

* * * *

തിരിച്ച് വന്ന് വസ്ത്രം മാറി അയാള്‍ കിടക്കയിലേക്കിരുന്നു.

‘വീണ്ടും പോയല്ലേ’ ഭാര്യ ചോദിച്ചു. ഇവളപ്പോള്‍ ഉറങ്ങിയിരുന്നില്ലേ... അയാളാലോചിച്ചു.

‘ങും...’ അയാള്‍ മൂളി

‘ഞാനപ്പഴേ പറഞ്ഞതല്ലേ, ഹോട്ടലീന്ന് കഴിക്കേണ്ടാന്ന്’

‘നിന്നെ ഉണര്‍ത്തേണ്ടെന്ന് കരുതി പതുക്കെയാണ് എണീറ്റ് പോയത്...’

‘അത് സാരമില്ലെന്നേയ്, ഞാനൊരു കട്ട ചായയുണ്ടാക്കി ചെറുനാരങ്ങ പിഴിഞ്ഞ് തരാം’

അയാള്‍ അതും വാങ്ങി കുടിച്ച് കിടന്നു, ഇനിയും ഉറക്കം പോവാതിരുന്നെങ്കില്‍ എന്ന മോഹത്തോടെ!